Human mipanaw ni Pope Francis sa edad nga 88, Lunes, Abril 21, o sa tinuod niining pangalan Jorge Mario Bergoglio, subling magtipon ang mga Cardinal sa Roma para sa Conclave nga magtuboy og bag-ong Santo Papa.
Kahinumdoman nga si Pope Francis ang labing una nga Latin American nga lider sa Simbahang Katoliko, hinungdan nga daghan ang galaum nga subling magtala og kasaysayan ang Simbahan.
Hisgutanan na dinhi ang pagtuboy og mga lahi nga Aprikano og Asianong Cardinal.
Una na niini si Cardinal Peter Turkson,76, nga gikan sa Ghana nga posibleng mahimong unang lahi nga Aprikano nga Santo Papa. Naila sa iyang papel isip peace envoy sa South Sudan og sa iyang panglantaw sa isyu sa LGBTQ+ sa Africa.
Ikaduha sa mga duol nga mahimong Santo Papa mao si Cardinal Luis Antonio Tagle, 67, nga gipanganak dinhi sa Pilipinas. Kanhi Arsobispo sa Manila og karon usa ka opisyal sa Vatican. Posibleng mahimong unang Asianong Papa si Tagle nga naila isip liberal, ug usa sa mga nanawagan og pagsabot para sa mga LGBTQ+ community og sa mag-asawang naga-divorced.
Ikatulo mao si Cardinal Pietro Parolin sa Italya, 70, usa ka kalihim sa Estado sa Vatican ug gikonsidera nga “continuity candidate.” Adunay halapad nga kasinatiang diplomatiko apan gisaway tungod sa gihimong kasabotan sa Vatican sa China.
Ikaupat mao si Cardinal Péter Erdő sa nasod Hungary, 72, – naila isip konserbatibo gikan sa kanhi Soviet bloc og usa sa mga misupak sa pagkomunyon sa mga katolikong bulag sa ilang mga kapikas sa kinabuhi o mga nangasawa pag-usab.
Ikalima mao si Cardinal José Tolentino de Mendonça, 59, gikan sa Portugal. Mas batan-ong kandidato nga abli sa modernong kultura. Naila sa iyang pagka-moderno og intelektuwal.
Ikaunom mao si Cardinal Matteo Zuppi, 69, sa Italya naila sa iyang mga gimbuhaton nga para sa kalinaw lakip ang misyon sa Ukraine. Suod kang Pope Francis og naila nga adunay kabalaka bahin sa sosyal nga mga isyu.
Ikapito mao si Cardinal Mario Grech sa Malta, 68, – nanawagan og bag-ong pinulongan sa Simbahan sa pag-atubang sa mga isyu sama sa diborsiyo ug same-sex relationships.
Ang ikawalo mao si Cardinal Robert Sarah sa nasod Guinea, 79. Usa usab nga posibleng unang lahi nga aprikano kung mamahimong Santo Papa. Bisan adunay edad na nailhan kini sa lig-on nga mga baruganan, labi na ang pagka-konserbati kung bahin sa mga Katoliko.
KULAY SA ASO GIKAN SA TSIMENEA
Nagasugod ang proseso sa eleksyon para sa musunod nga Santo Papa sa sulod sa Sistine Chapel sa Vatican. Sumala sa tradisyon, duha ka higayon sa usa ka adlaw nga magbotar ang mga Cardinal hangtod sa adunay makakuha og kapin sa 2/3 sa boto para matuboy isip bag-ong lider sa Simbahang Katolika.
Ang mga boto ang ginasulat sa usa ka card nga may nakasulat nga Latin nga hugpong sa mga pulong nga “Eligo in Summum Pontificem”, nga nagpasabot nga “Pinipili ko bilang Kataas-taasang Santo Papa.” Bag-o ihulog ang card sa usa ka gold chalice, ang matag Cardinal ang mag-ampo una.
Samtang ginapahigayon ang pagbotar, libuan ka tawo ang kasagaran nga nagatigom sa St. Peter’s Square aron bantayan ang aso gikan sa tsimenea sa Sistine Chapel.
Kung walay magdaog nga kandidato, ginasunog ang mga balota kauban sa usa ka kemikal nga nagapagawas ug itum nga aso, timaan nga wala pay bag-ong natuboy nga Papa. Samtang kung adunay natuboy na, puti nga aso ang mugawas isip timaan nga aduna nay bag-ong natuboy nga Santo Papa.
