Gipasiugda ni Bicol Saro Party-list Rep. Terry Ridon nga ang proseso sa impeachment batok kang VP Sara Duterte istrikto nga nagsubay sa balaod ug nakabase sa lig-on nga ebidensya.
Matud niya, andam ang House Committee on Justice nga depensahan ang proseso sa patas ug legal nga paagi kung dad-on kini sa kampo sa Bise Presidente ngadto sa Korte Suprema.
Gihimakak ni Ridon ang mga alegasyon nga base lang sa espekulasyon ang maong lakang; hinuon, giingon niya nga adunay konkretong basehan sama sa ulat sa Commission on Audit (COA) bahin sa P73 milyon (rechecked value) nga disallowed confidential funds ug sa SALN ni Duterte.
Gikinahanglan usab nga mapatin-aw ang agwat sa gibana-bana nga P30-P40 milyon nga sahod gikan 2007 hangtod 2024 kumpara sa P88 milyon nga net worth ni Duterte niadtong 2023.
Gipasiguro ni Ridon nga gisunod ang due process ug matagaan og higayon ang Bise Presidente sa pagtubag sa matag yugto sa pagdungog.
Ang komite magpadayon sa pagsusi sa mga dokumento ug records aron matino kung adunay igong “probable cause” sa pagpadayon sa impeachment.
