Giklaro ni Former Surigao del Norte Representative Ace Barbers, spokesperson sa House prosecution panel, nga dili igo nga pamatuod ang pag-ingon nga “alias” ang pipila ka mga ngalan sa confidential fund records ni Vice President Sara Duterte aron mapamatud-an nga adunay tinuod nga nakadawat sa kwarta.
Matud ni Barbers, kinahanglan ipakita sa depensa pinaagi sa hustong audit o proseso sa korte kung kinsa gyud ang nakadawat sa pondo ug unsa ang mga dokumentong makapamatuod niini.
Una nang giingon sa defense panel nga mga alias ang pipila ka ngalan sa acknowledgment receipts, lakip ang “Mary Grace Piattos.”
Gipasiugda ni Barbers nga ang kawalay record sa Philippine Statistics Authority o PSA dili awtomatikong nagpasabot nga peke ang usa ka tawo.
Apan matud niya, dili usab igo ang pag-ingon nga alias ang ngalan aron mapamatud-an nga adunay tinuod nga tawo nga nakadawat sa kwarta.
Gipunto sa prosekusyon nga bisan confidential ang pondo, kinahanglan gihapon mapamatud-an nga kini gigasto alang sa awtorisadong mga katuyoan ug adunay mga rekord nga mosuporta sa mga transaksyon.
Gilauman nga hatagan og higayon ang depensa nga ipakita ang ilang ebidensya ug ipatin-aw kung kinsa ang tinuod nga mga nakadawat sa kwarta atol sa pagpresentar nila sa ilang kaso atubangan sa impeachment court.
