Magpadayon gihapon ang implementasyon sa Ayuda para sa Kapos ang Kita Program (AKAP) sa Department of Social Welfare and Development (DSWD) bisan og walay gigahin nga pundo alang niini sa 2026.
Matod ni DSWD Assistant Secretary Irene Dumlao sa Inbox program sa Abante, aduna pay nahabiling P11 bilyones nga pundo nga gamiton sa pagpadayon sa programa. Siya midugang nga ang mga kinahanglanon alang sa mga benepisyaryo sa AKAP wala usab mausab.
Siya miingon nga ang mga aplikante mopailawom sa usa ka interbyu o assessment sa mga social worker ug gikinahanglan nga mosumite sa mga may kalabutan nga mga dokumento.
Dugang pa, gihimug-atan usab ni Dumlao nga bukas ang DSWD sa bisan unsang sugyot sa pagpalambo sa pagpatuman sa Pantawid Pamilyang Pilipino Program (4Ps), nga gipatuman sulod sa 17 ka tuig.
Gipasalig usab sa opisyal nga andam ang DSWD nga mosumitir og report sa ilang mga programa aron masiguro nga ang mga hinabang makaabot sa mga tinuod nga nanginahanglan.
Samtang, si DSWD Secretary Rex Gatchalian niisyu og guideline nga hugot nga gidid-an ang mga benepisyaryo sa paggamit sa mga hinabang nga ilang nadawat alang sa sugal.
