Nahimong malampuson ang Integrated Air and Missile Defense exercise nga gihimo sa Armed Forces of the Philippines ug United States Armed Forces sa San Antonio, Zambales.
Kabahin kini sa nagpadayon nga Balikatan Exercises 2026 diin liboan ka mga sundalo gikan sa Pilipinas, Estados Unidos, Japan, Australia ug uban pang nasod ang miapil.
Gihimo ang military simulation sulod sa tulo ka adlaw gikan Abril 26 hangtod Abril 29 sa nagkadaiyang strategic areas sa Zambales.
Gigamit sa maong drill ang lain-laing modernong defense systems sama sa U.S. Marine Air Defense Integrated System, military drones ug uban pang kagamitang pangdepensa.
Naghiusa usab dinhi ang mga nag-unang air defense units lakip ang 3rd Light Air Defense Artillery Battalion, E/6-52 35th Air Defense Artillery, ug 960th Air and Missile Defense Wing.
Usa sa tumong sa maong simulation mao ang pagpalig-on sa kapasidad sa Pilipinas ug Estados Unidos batok sa mga hulga sa kahanginan ug masusi ang angay pang paunlaron, samtang nagsilbi usab nga observer ang Japan Air Self-Defense Force.
