Gipanukala sa Marcos administration ang P10.773 bilyon nga confidential ug intelligence funds (CIF) ubos sa 2027 proposed national budget.
Ang gipanukalang CIF 8.8 porsyentong mas ubos kumpara sa P11.818 bilyon nga gipagawas para karong 2026.
Girekomendahan sa ehekutibo ang P4.368 bilyon para sa confidential funds, samtang P6.405 bilyon ang para sa intelligence funds.
Sumala kang Acting Budget Secretary Kim Robert De Leon, ang mga ahensya lamang nga lehitimong gitugotan sa pagpanghimo og confidential ug intelligence functions ang makadawat sa maong pondo ubos sa National Expenditure Program o NEP para sa fiscal year 2027.
Giingon sa kalihim nga ang paggamit sa CIF ipatuman ubos sa mga nag-una na nga budgeting, utilization, liquidation ug auditing rules aron masiguro ang tulubagon ug magamit ang pondo sa hustong tumong.
Samtang, gipanukala sa ehekutibo ang P111.98 bilyon nga unprogrammed appropriations o UA para sa 2027. Matud sa Department of Budget and Management o DBM, mao kini ang pinakubos nga halaga sa UA sukad 2019.
Dakong bahin sa maong pondo igamit sa pagpundo sa mga foreign-assisted projects.
Gipasiugda ni House Committee on Appropriations Chairperson Mikaela Suansing nga dili nila tugotan nga gamiton ang unprogrammed appropriations sa mga flood control projects ug gamiton lamang kini sa mga item nga gikinahanglan gyud.
Gitakda nga sugdan ang deliberasyon sa P7.2 trilyong gipanukala sa national budget sa Mababang Kapulungan sa Agosto 17, uban sa briefing sa Development Budget Coordination Committee.
