Gikonsiderar ni Presidente Ferdinand Marcos Jr. ang paghatag og absolute pardon kang Mary Jane Veloso, sumala sa Malacañang.
Matud ni Palace Press Officer Atty. Claire Castro, hulaton na lamang ang desisyon sa Presidente ug kung kanus-a kini ipahibalo sa publiko.
Lakip sa gikonsiderar sa absolute pardon ang humanitarian reasons ug ang giingong wala’y sala si Veloso sa dihang nadakpan siya sa Indonesia human makaplagan sa iyang bagahe ang 2.16 kilos nga heroin niadtong 2010.
Giklaro usab ni Castro nga dili na kinahanglan nga ipaabot pa sa gobyerno sa Indonesia kung mahatagan og absolute pardon si Veloso.
Nahukman si Veloso og death penalty sa Indonesia tungod sa pagdala og ilegal nga droga ug napulihan kini og reprieve human sa diplomatic negotiations tali sa Pilipinas ug Indonesia.
Human sa maong negosasyon, gibalhin si Veloso ngadto sa kustodiya sa gobyerno sa Pilipinas ug kasamtangang nakadetine sa Correctional Institution for Women sa Mandaluyong City.
