-- ADVERTISEMENT --

Gipahayag ni Pangulong Ferdinand “Bongbong” Marcos Jr. nga naglibog siya sa mga protesta batok sa Pax Silica initiative sa Estados Unidos.

Matod sa presidente, wala pa ma-finalize ang bisan unsang kasabutan kalabot sa maong inisyatiba ug wala pa usab kini mapirmahan, busa wala siya makasabot nganong adunay mga protesta batok sa proyekto nga wala pa man pormal nga nasabutan.

“Wala pa tayong pinag-usapan. Wala pa tayong pinirmahan,” matud ni Marcos.

Sa press conference niadtong Biyernes, human sa 33rd APEC Economic Leaders’ Meeting sa Shenzhen, China, giklaro sa presidente nga dili usab magtukod og mga data center sa Pilipinas ubos sa maong inisyatiba.

Matod pa niya, ang proyekto nakasentro lamang sa artificial intelligence o AI ug nagtumong sa pagpalambo sa mga produktong teknolohiya ug pag-apil sa Pilipinas sa nagtubo nga AI economy.

-- ADVERTISEMENT --

Dugang pa sa presidente, higayon kini alang sa nasud nga makaapil sa paghulma sa global nga industriya sa artificial intelligence imbes nga mahimong konsumidor lamang sa mga produkto niini.

Giawhag usab ni Marcos ang publiko nga masabtan ug dawaton ang maong mga proyekto tungod sa gipaabot nga kontribusyon niini sa ekonomiya sa Pilipinas, Southeast Asia ug sa tibuok kalibotan.

Samtang, ninglabay nga mga semana, liboan ka mga tawo ang nagpahigayon og mga protesta sa nagkadaiyang bahin sa kalibotan batok sa Pax Silica initiative tungod sa kabalaka nga posibleng makadaot kini sa kalikopan ug sa mga natural resources.