-- ADVERTISEMENT --

Gi-aresto sa US Immigration and Customs Enforcement (ICE) ang kanhing world boxing champion nga si Jorge Linares sa El Paso International Airport sa Texas.

Gikumpirma sa ICE nga gidakop ang kanhing boksingero tungod sa giingong pagpabilin niini sa Estados Unidos nga milapas na sa gitugot nga panahon sa iyang temporary stay permit.

Misulod siya sa nasod niadtong Oktubre 26, 2023, ug nag-atubang karon og deportation proceedings. Apan, giinsistir sa legal team ni Linares nga adunay siya permiso nga magpabilin sa Estados Unidos ug nakigtambayayong siya sa mga awtoridad aron masulbad ang maong isyu.

Nagretiro si Linares niadtong 2023 human sa kapin duha ka dekadang karera sa professional boxing, diin nahimong world champion siya sa featherweight, super featherweight ug lightweight divisions.