Pormal nang gidawat sa Singapore ang pagpangulo sa Association of Southeast Asian Nations o ASEAN alang sa tuig 2027 atol sa closing ceremony sa ASEAN Summit and Related Summits 2026.
Sa iyang pakigpulong, gidayeg ni Singapore Prime Minister Lawrence Wong ang Pilipinas, ubos sa pagpangulo ni Pangulong Ferdinand Marcos Jr., tungod sa malampusong pagdumala niini isip ASEAN Chair karong tuiga.
Matud ni Wong, lisod ang milabay nga tuig alang sa rehiyon ug sa tibuok kalibotan, apan ubos sa pagpangulo sa Pilipinas, nagpabiling nagkahiusa ang ASEAN ug nagpadayon sa paglihok aron makab-ot ang ilang mga tumong.
Gipasiugda usab niya ang temang “Deeper Integration at Wider Partnership” nga nagtumong sa pagpalig-on sa panaghiusa ug kooperasyon sa mga miyembro sa ASEAN ug uban pang mga kaabag sa tibuok kalibotan aron mapalapdan ang mga oportunidad, mapadayon ang kalinaw ug mapalig-on ang rehiyon.











