-- ADVERTISEMENT --

Gipahibalo sa Meta nga permanenteng papason sugod Disyembre 14 ang mga dugang o secondary Facebook profile nga konektado sa usa ka Meta login.

Dili apil niini ang main Facebook profile sa mga tiggamit ug dili usab maapektuhan ang mga Business Page.

Gipahimangnoan sa Meta ang mga tag-iya sa secondary profile nga i-download ug i-backup ang ilang mga impormasyon sa dili pa moabot ang gitakdang petsa.

Mahimo usab nilang ibalhin sa ilang main profile ang pagdumala sa mga grupo nga ilang gidumalahan.

Kinahanglan usab nilang idugang pag-usab ang ilang mga higala, moapil sa mga grupo ug mo-follow sa mga Page gamit ang ilang pangunang account.

-- ADVERTISEMENT --

Aron makakuha og kopya sa ilang mga datos, kinahanglan nga moadto una sa secondary profile, ablihan ang Settings & Privacy, pilion ang Settings ug pangitaon ang Export Your Information ubos sa Your Information and Permissions.

Gipasiugda nga kinahanglan kining buhaton sa matag dugang nga profile sa dili pa ang Disyembre 14 tungod kay permanenteng papason ang maong mga account lakip na ang tanang impormasyon nga konektado niini human sa maong petsa.