Gilaoman ni lead prosecutor ug Batangas Representative Gerville Luistro nga mahuman na sa dili pa ang Pasko karong 2026 ang impeachment process batok kang Vice President Sara Duterte, imbes nga madugay pa hangtod sa 2027 o 2028.
Matud ni Luistro, tulo na ka tuig nga gihisgutan ang maong isyu busa panahon na aron mahibal-an ang hukom kung makonbikto ba o mapahigawas sa kaso ang Bise Presidente.
Gipahayag kini sa kongresista human giingong miingon si Atty. Paolo Panelo nga target nilang mahuman ang impeachment process sa dili pa ang Pasko aron dili kaayo masuko ang publiko kon makonbikto si Duterte.
Apan giklaro ni Luistro nga wala silay kasayuran kung unsa ang mahimong boto sa mga senador nga magsilbing huwes, kung conviction ba o acquittal.
Dugang pa niya, nagsugod pa niadtong 2024 ang mga imbestigasyon kalabot sa confidential funds ug bribery, gisundan sa unang impeachment niadtong 2025 ug karon ang ikaduhang impeachment batok sa Bise Presidente.
Gibutyag usab ni Luistro nga kinahanglan nang tapuson ang taas nga impeachment process, ilabi na kung wala nay maipresentar nga mga saksi ang depensa aron mosupak sa mga ebidensiya sa prosekusyon kalabot sa unexplained wealth ug paglapas sa Statement of Assets, Liabilities and Net Worth o SALN Law.
Gipasabot usab sa kongresista nga wala sa kamot sa prosekusyon ang desisyon kung makonbikto ba o mapahigawas sa nahibiling mga kaso si Duterte.











