Namatay ang usa ka 64 anyos nga babaye human maapil sa banggaanay sa duha ka motorsiklo sa Nopol-Conel Road, Barangay Mabuhay, General Santos City, pasado alas 7 kagahapon sa gabii, Nobyembre 16.
Giila ang biktima nga si Luzviminda Tanio Lausa, residente sa Purok 27 Yam, Barangay Mabuhay, nga angkas sa Kymco motorcycle nga gimaneho sa iyang 65 anyos nga bana nga si Dominador Fernando Lausa.
Samtang, ang laing motorsiklo nga Kawasaki Bajaj gimaneho sa 17 anyos nga si Cedrick Renz Soriano, residente usab sa Barangay Mabuhay.
Base sa imbestigasyon sa Traffic Enforcement Unit o TEU sa General Santos City Police Office, nagbiyahe sa parehas nga direksyon ang duha ka motorsiklo gikan sa Circumferential Road padulong sa NGCP area.
Misulay og overtake ang ikaduhang motorsiklo pinaagi sa paggamit sa pikas lane, apan miliko sa wala ang unang motorsiklo hinungdan nga nagbanggaay ang duha ka sakyanan.
Nakaangkon og grabeng samad sa ulo ang biktima ug dali nga gidala sa rescue ambulance ngadto sa MMC Hospital, apan gideklarang dead on arrival sa attending physician alas 7:40 sa gabii.
Nakaangkon usab og gagmayng samad ang duha ka drayber. Gidala na sa TEU ang mga drayber ug ang ilang mga motorsiklo alang sa dokumentasyon ug hustong disposisyon.
Matikdan nga walay napresentar nga rehistro sa duha ka motorsiklo ug lisensya sa pagmaneho ang duha ka drayber.











