Nasikop sa kapulisan ang usa sa tulo ka lalaki nga nalambigit sa pagpangawat og abokado sa usa ka plantasyon sa DOLE Stanfilco sa Sitio Le-ing, Barangay Acmonan, Tupi, South Cotabato, alas 5:45 ning Martes sa buntag, Nobyembre 17.
Giila ang nadakpan nga si Sandro Piang Samling, 31 anyos, minyo ug trabahante nga residente sa maong barangay.
Samtang, naangol usab ang usa sa iyang mga kauban nga giila nga si Marlon Maganto ug gidala sa Municipal Hospital alang sa pagpatambal, samtang ang laing suspek nga si Roger Piang nagpabiling wala pa madakpi.
Narekober gikan sa ilang posisyon ang usa ka sako nga adunay bag-ong pitas nga abokado nga motimbang og mokabat sa 20 ka kilo ug nagkantidad og 10 mil pesos.
Base sa report sa Tupi Municipal Police Station, nadawat nila ang report kabahin sa insidente alas 6:40 sa buntag ug dali nga mitubag ang mga kapulisan.
Giandam na sa kapulisan ang tukmang kaso batok sa mga nalambigit nga suspek ug ipasaka kini pinaagi sa inquest proceedings sa Provincial Prosecutor’s Office sa Polomolok, South Cotabato.











