Nagpagawas ang Department of Education (DepEd) og bag-ong mga panudlo aron mas maandam sa trabaho ang mga senior high school students human makagradwar sa Grade 12.
Matod ni Education Secretary Sonny Angara, tumong niini nga mahatagan ang mga estudyante og aktuwal nga kasinatian sa trabaho ug mas mapataas ang ilang kahigayonan nga makakitag trabaho dayon.
Ubos sa DepEd Order No. 023, Series of 2026, mandatory ang work immersion alang sa Technical-Professional Track nga kinahanglan moagi og 320 hangtod 640 ka oras nga pagbansay.
Optional lamang kini alang sa Academic Track, nga mahimo usab mopili sa 80-oras nga Field Exposure. Lakip usab ang Arts Apprenticeship alang sa mga gustong mosulod sa arts ug media.
Gipahinumdoman sa DepEd nga dili gamiton ang mga estudyante isip libre nga trabahante ug limitado lamang sa walo ka oras kada adlaw ug lima ka adlaw kada semana ang ilang pagbansay.
Sugdan ang pagpatuman niini sa mga piniling eskwelahan sa School Year 2026–2027, sa dili pa ipalapad sa ubang senior high schools sa 2027.
