Naapektuhan ang libo-libo nga users sa nagkalain-laing serbisyo sa Microsoft human makasinati og kaylap nga system outage karong Biyernes, Nobyembre 13.
Base sa datos sa third-party detector nga Downdetector, mokabat sa 130,000 users ang unang mireport og problema sa Microsoft Outlook alas dos sa kaadlawon, apan mikunhod kini ngadto sa 50,000 pagsapit sa alas 5:30 sa buntag.
Nasinati usab ang system outage sa ubang software niini sama sa Microsoft Teams ug AI assistant nga Copilot.
Matud sa kompanya, gituohang hinungdan sa problema sa koneksyon ang taas nga load sa ilang mga imprastraktura nga nahimutang sa nagkalain-laing rehiyon.
Lakip sa naapektuhan ang pipila ka users sa Southeast Asia, lakip na ang mga IT professional ug empleyado sa BPO sa Pilipinas.
Gipasalig usab sa Microsoft nga gisulbad na nila ang maong problema ug gisusi ang tanang posibleng paagi aron maminusan ang epekto niini.
“We’re aggressively pursuing all pathways to reduce impact… We’ve paused all deployments, we’re moving additional traffic off the affected infrastructure, and we’re restarting affected servers to return them to service,” gisulti niini sa ilang pahayag.
