Gidawat ni BIR Commissioner Charlito Martin R. Mendoza ang bag-ong katungdanan isip hepe sa Bureau of Customs (BOC) human siya itudlo ni Pangulong Ferdinand R. Marcos Jr..
Sa opisyal nga pahayag kagahapon, Nobyembre 12, nagpasalamat si Mendoza sa Presidente tungod sa pagsalig nga gihatag kaniya, ingon man sa mga kawani sa BIR nga iyang kauban sa pagpalambo sa ‘long-term digital’ transformation sa ahensya sulod sa miaging tuig.
Giawhag usab niya ang mga opisyal ug empleyado sa BIR nga ihatag ang ilang bug-os nga suporta sa mosulod nga Commissioner nga si Rolando T. Ligon Jr. aron mapadayon ang mga proyekto alang sa modernisasyon sa sistema sa buhis.
Samtang, giila ni Mendoza ang mga repormang gisugdan ni Commissioner Ariel F. Nepomuceno sa BOC ug misaad nga ipadayon ug palapdan pa ang mga nasugdan nang lakang sulod sa kawanihan.
Gipasalig usab sa bag-ong hepe sa BOC nga andam na siyang makigtambayayong sa mga kawani sa ahensya aron palig-onon ang pagpanalipod sa mga utlanan sa nasud, mapadayon ang taas nga koleksyon sa kita sa gobyerno ug mapadali ang lehitimong patigayon, subay sa mga prayoridad ni Pangulong Marcos ug Secretary Go.
