Mariing gikondena sa Korte Suprema ang pagpatay kang Presiding Judge Joseph M. Wee Sit sa Branch 2 sa Regional Trial Court sa Isabela City, Basilan, human siya gipusil sa Tumaga-Putik Road, Barangay Tumaga, Zamboanga City kagahapon Nobyembre 12.
Sa opisyal nga pahayag sa korte, mipadayag kini og pakikiramay sa pamilya, mga suod ug kauban sa trabaho sa namatay nga huwes.
Gimandoan na ni Chief Justice Rodil V. Zalameda ang Office of the Court Administrator, kauban ang Regional Court Manager ug Executive Judge, nga personal nga makig-uban sa pamilya aron maseguro ang ilang pinansyal ug uban pang panginahanglanon.
Nakigtambayayong na usab ang Korte Suprema sa mga otoridad pinaagi sa Office of the Judiciary Marshals aron imbestigahan ang krimen ug mailhan ang mga responsable. Apan wala pa gipagawas sa korte ang ubang detalye sa imbestigasyon tungod sa seguridad sa kaso.
Gipasiugda sa Korte Suprema nga ang pag-atake batok sa mga huwes dili lamang hulga sa ilang personal nga kaluwasan, kondili usa usab ka hulga sa kagawasan ug patas nga paghatag og hustisya sa nasud.
