Nagkahiusa ang Department of Health (DOH) ug Department of Finance (DOF), uban sa nagkadaiyang mga health professional, aron iduso ang pagpataas sa excise tax sa mga produkto nga adunay makaadik nga sulod ug sa mga tam-is nga ilimnon.
Lakip sa mga produkto nga gipasabot sa maong sugyot ang mga ilimnong makahubog, tabako ug mga sugar-sweetened beverages nga direktang makaapekto sa panglawas sa publiko.
Matod ni Dr. Paul Filomeno, usa ka espesyalista sa recovery medicine, tumong niini nga mapanalipdan ug mapauswag ang panglawas sa matag Pilipino, samtang makamugna usab og dugang pondo nga magamit sa pagpalig-on sa mga serbisyo sa panglawas sa nasud.
Gipasiugda usab ni Filomeno nga ang dugang nga kita gikan sa maong mga buhis mahimong importante nga suporta aron mas mapadali ang pagpatuman ug mapondohan ang mga tumong sa Universal Health Care Act.
Sa pagkakaron, gipailalom na sa nagkadaiyang pagdungog ug deliberasyon sa Kongreso ang maong sugyot, diin target sa mga magbabalaod nga mahuman kini sa labing dali nga panahon karong tuiga.
Nagbarog ang mga health professional sa ilang panawagan nga mapasar ang maong sugyot isip usa ka lakang aron mapanalipdan ang kaugmaon sa kabatan-onan batok sa mga kadaot nga mahimong madulot sa sayong pagkonsumo sa maong mga produkto
