Gikuwestiyon ni Senator-Judge Robin Padilla ang pagpangutana sa prosekusyon kalabot sa biyahe sa China sa naunang testigo sa depensa atol sa impeachment trial batok kang Vice President Sara Duterte.
Nahimo kini atol sa ika-43 nga adlaw sa impeachment trial niadtong Huwebes.
Gipaambit ni Padilla nga kaduha na siyang nakabiyahe sa China, diin sa usa niini kauban niya ang kanhi Presidente Rodrigo Duterte. Apan miangkon siya nga dili na usab niya mahinumduman ang eksaktong mga lugar nga ilang nabisitahan.
Matud ni Padilla, nangutana pa siya sa iyang staff aron mahibal-an ang mga lugar nga iyang naadtoan tungod kay wala na niya kini mahinumduman.
Giklaro usab ni House Prosecutor ug Representative Terry Ridon nga dili ang pag-adto sa China ang ilang gikuwestiyon kondili ang mga tubag sa testigo nga may kalabotan sa iyang kredibilidad.
Matud ni Ridon, pipila ka higayon nga wala matubag diretso sa testigo ang mga pangutana kalabot sa iyang biyahe ug gikinahanglan pa ang dugang nga pagpatin-aw gikan sa mga senador aron makumpirma ang pipila ka impormasyon.
Apan giinsistir ni Padilla nga angay usab hatagan og konsiderasyon ang mga testigo nga dili na makahinumdom sa pipila ka detalye sa ilang mga kasinatian.
Matud pa, gipangutana sa prosekusyon ug pipila ka senador ang kanhing testigo sa depensa nga si Davao City Assessor Jaime Adalin kalabot sa iyang biyahe sa China, lakip na ang pag-adto sa Beijing ug pagpauli gikan sa Shanghai.
