Opisyal nang mitungha isip unang testigo sa depensa si Davao City Assessor Engineer Jaime G. Adalin sa pagpadayon sa impeachment trial batok kang Vice President Sara Duterte karong Lunes, Nobyembre 9, 2026.
Gipresentar ni defense counsel Atty. Lindon Miguel Bacquel si Adalin aron pamatud-an nga husto nga nadeklara sa Bise Presidente sa iyang Statement of Assets, Liabilities and Net Worth o SALN ang usa ka propyedad nga sakop sa Transfer Certificate of Title o TCT.
Apan gikuwestiyon dayon ni prosecution counsel Atty. Benjamin Tolosa Jr. ang tumong sa depensa, ug miingon nga dili mapamatud-an sa testigo nga parehas ang propyedad nga naa sa SALN ug ang naa sa TCT tungod sa klarong kalainan sa acquisition value o kantidad sa pag-angkon niini.
Misupak usab ang prosekusyon sa pipila ka testimonya nga gustong ipresentar sa depensa, nga giingong dili angay ug mahimong makalibog sa paghusay sa kaso.
Samtang nagpadayon ang hearing, mihangyo si Atty. Bacquel nga temporaryong suspindihon ang pagtaral aron masusi ang dugang nga mga dokumento nga gidala sa testigo.
Sa wala pa ang mubo nga pagsuspinde sa hearing, gikumpirma usab ni Adalin pinaagi sa Administrative District Index Map nga ang Barangay Matina Crossing ug Barangay 74-A usa lamang ka lugar sa Davao City, human gibutyag ni Escudero nga andam ang prosekusyon nga mouyon sa maong punto.
