Nagpahimangno si Presidente Ferdinand Marcos Jr. sa mga lokal nga panggamhanan o Local Government Units (LGU) nga dili abusaran o himuong pangnegosyo ang pondo sa gobyerno nga gitagana alang sa mga lugar nga naapektuhan sa kalamidad.
Sa iyang mensahe atol sa ceremonial turnover sa Disaster Rehabilitation and Reconstruction Assistance Program funds sa Malacañang, gipasiugda sa Pangulo nga manubag sa balaod ang bisan kinsa nga mag-abuso sa maong pondo.
Gibutyag nga mokabat sa P8.5 bilyones ang gigahin sa gobyerno alang sa mga LGU nga naapektuhan sa mga kalamidad gikan sa tuig 2024 hangtod 2026, depende sa ilang panginahanglan.
Gipahinumdoman usab sa Pangulo nga kwarta kini sa katawhan nga gitagana alang sa mga biktima sa kalamidad ug dili angay gamiton aron makaganansya o makapauswag sa personal nga bahandi. Gidili usab ang ghost projects, pagpangayo og komisyon ug paggamit og substandard nga mga materyales sa mga proyekto.
Giawhag ni Marcos ang mga LGU nga tumanon ang ilang katungdanan uban ang pagkamatinud-anon ug ihatag sa katawhan ang angay nga serbisyo.
