Nakamonitor ang Armed Forces of the Philippines (AFP) og 80 ka Chinese warships ug coast guard vessels sa West Philippine Sea atol sa tibuok bulan sa Oktubre.
Mas ubos kini kumpara sa 101 ka Chinese vessels nga natala niadtong Septyembre, sumala sa AFP.
Matud ni AFP spokesperson for the West Philippine Sea retired Rear Admiral Roy Vincent Trinidad, namatikdan ang maong mga barko sa upat ka maritime features sa WPS.
Sa Ayungin Shoal, 24 ka barko ang namonitor, samtang 41 sa Bajo de Masinloc, 11 sa Escoda Shoal ug upat sa Pag-asa Islands.
Gilangkuban kini sa mga barko sa People’s Liberation Army Navy ug China Coast Guard.
Gihulagway ni Trinidad nga ang presensya ug lihok sa maong mga barko usa ka hagit sa soberanong katungod ug hurisdiksyon sa Pilipinas sa iyang maritime domain.
Gipasalig sa AFP nga ipadayon ang pagbantay ug pagdokumento sa mga lihok sa Chinese vessels, lakip ang koordinasyon sa Department of Foreign Affairs aron mapanalipdan ang interes sa nasud.
