Gipadayag sa DOST-PHIVOLCS ang kahinungdanon sa kaandam ug kahibalo sa publiko aron malikayan ang dakong kadaot sa kinabuhi panahon sa kusog nga linog ug posibleng tsunami.
Kini ang pahimangno ni PHIVOLCS Director Teresito Bacolcol atol sa pag-obserbar sa World Tsunami Awareness Day karong Nobyembre 5, nga gisabayan usab sa Fourth Quarter Nationwide Simultaneous Earthquake Drill sa nagkadaiyang bahin sa nasud.
Gipasabot ni Bacolcol nga kinahanglan mahibal-an sa mga residente ilabi na sa mga komunidad nga duol sa dagat ang natural nga mga timailhan sa posibleng pag-abot sa tsunami.
Lakip niini ang kusog ug dugay nga pag-uyog sa yuta nga molungtad og kapin sa 20 segundos, kalit nga pag-atras sa tubig-dagat ug dili kasagarang kusog nga tingog gikan sa kadagatan.
Gipahinumdoman ang publiko nga dili na maghulat sa opisyal nga pahibalo kon makita ang maong mga timailhan, kondili dihadiha nga mobalhin sa mas taas nga lugar o gitakdang evacuation area.
Samtang, giplanong sugdan sa PHIVOLCS sa sunod tuig ang modernisasyon sa ilang sistema lakip ang pagdugang og 161 ka bag-ong mga kabtangan aron mapaspas ang pagmonitor ug pagpagawas sa tsunami warnings.
