Gisorpresa sa mga operatiba sa Philippine Charity Sweepstakes Office o PCSO ug National Bureau of Investigation ang usa ka lotto outlet sa Caloocan City nga giingong gigamit lamang nga tabon sa ilegal nga sugal.
Gipahigayon ang operasyon kagahapon, Nobyembre 4, human madiskubre sa test-buy nga nag-isyu kini og peke nga lotto tickets ug modawat og pusta pinaagi sa GCash.
Gidakop sa mga otoridad ang teller sa maong outlet ug nakumpiska ang kapin lima ka libong pesos nga pusta, cellphone, peke nga tickets ug mga kagamitan sa lotto terminal.
Narekober usab ang mga resibo, ticket rolls ug mga dokumento nga may kalabotan sa mga transaksyon sa maong outlet.
Gipasidan-an ni PCSO General Manager Melquiades Robles ang publiko nga dili motaya sa mga dili awtorisadong lotto outlet tungod kay walay kasiguroan sa ilang mga transaksyon.
Samtang, gipasalig sa PCSO nga ipadayon ang koordinasyon sa NBI aron mapugngan ang pagdaghan sa ilegal nga pagpusta ug mapanalipdan ang publiko batok sa pagpanglimbong.
