Gisusi sa Department of Agriculture ang walo ka farm-to-market road projects nga posibleng dili na maipatuman human madiskobrehan nga sayop ang ilang coordinates sa gisugyot nga 2027 national budget.
Ang maong mga proyekto nalakip sa mga nakit-ang adunay red flags sa bersyon sa proposed budget nga giaprobahan sa House of Representatives.
Matod ni DA Asec. U-Nichols Manalo, nalakip ang maong mga proyekto sa National Expenditure Program o NEP ug dili kini budget insertion.
Gipadayon usab sa ahensya ang pagsusi sa ubang farm-to-market road projects aron masiguro nga wala nay laing sayop sa coordinates niini.
Gipadayag kini ni Manalo atol sa hearing sa House Committee on Agriculture and Food niadtong Nobyembre 4.
Gipasabot usab ni House Committee on Appropriations Vice Chair Arnie Fuentebella nga mahimo pang tul-iron sa Department of Agriculture ang sayop nga coordinates tungod kay wala pa mahuman ang proseso sa pag-apruba sa budget. Tumong niini nga malikayan ang pag-usik sa pondo alang sa mga proyekto nga gikinahanglan sa mga mag-uuma.
Gihisgutan usab sa hearing ang pagpangandam sa gobyerno batok sa posibleng epekto sa grabeng El Niño sa tibuok nasud, lakip ang koordinasyon sa mga ahensya, transparency sa pag-apod-apod sa pondo ug pagtino sa dugang nga mga kahinguhaan nga gikinahanglan.
