Nagmugna ang grupo sa mga researchers sa Switzerland og robot nga kamot nga makalakaw gamit ang kaugalingong mga tudlo nga walay tabang gikan sa tawo.
Gipagawas sa mga researchers gikan sa Soft Robotics Lab sa ETH Zurich ang mga video ug pagtuon bahin sa maong teknolohiya nga ilang gitandi sa karakter nga si “Thing”, ang buhi ug nagalihok nga kamot sa “The Addams Family”.
Matud ni Amirhossein Kazemipour, doctoral candidate sa maong laboratoryo, usa sa mga hagit sa paghimo sa robot mao ang pagkat-on niini sa hustong paglihok sa mga tudlo nga dili managsama ang porma ug gimbuhaton samtang nagmintinar sa balanse.
Gigamit sa team ang machine learning aron tudloan ang robot sa paglakaw pinaagi sa computer simulation, diin makakat-on kini sa mga lihok nga makatabang aron makab-ot ang gitakdang tumong nga dili na kinahanglan nga i-program ang matag lihok nga tagsa-tagsa.
Gipakita usab sa mga video nga ang robot nga kamot makalihok sa nagkalainlaing klase sa salog, makabarog pag-usab human matumba, makaduso og mga butang ug makagamit pa gani og computer keyboard.
Sumala ni Robert Katzschmann, assistant professor sa ETH Zurich, ang maong teknolohiya mahimong mapuslanon sa umaabot, ilabina sa mga lugar nga lisod sudlan sa dagkong robot, sama sa pig-ot nga mga luna ug mga lugar nga naapektuhan sa kalamidad.
