Kapin sa 37,000 ka pasahero ang natala sa mga pantalan sa unang adlaw sa UNDAS 2026 – PCG

Nakarekord ang Philippine Coast Guard o PCG og kapin sa 37 mil ka pasahero sa mga pantalan sa tibuok nasud sulod sa unang unom ka oras sa Nobyembre 1, atol sa pagsaulog sa Undas 2026.

Base sa datos sa PCG, mikabat sa 19,669 ang mga pasaherong nakabyahe na, samtang 17,644 ang mga pasaherong miabot gikan alas 12:00 sa tungang gabii hangtod alas 6:00 sa buntag.

Gisusi usab sa PCG ang 161 ka barko ug 160 ka motorbanca isip kabahin sa “Oplan Biyaheng Ayos” aron masiguro ang kaluwasan sa mga pasahero.

Nagpakalat usab ang ahensya og 6,153 ka personahe sa nagkadaiyang pantalan sa nasud ug nagpataas sa alerto sa mga distrito ug estasyon niini tungod sa gipaabot nga pagdaghan sa mga biyahero.