Gisaad ni Presidente Ferdinand Marcos Jr. ang padayong suporta sa nasudnong gobyerno sa Bangsamoro Region, subay sa pagsugod sa unang regular nga parliamentary government sa rehiyon human sa pito ka tuig nga transisyon.
Sa iyang pakigpulong atol sa inaugural session sa unang halal nga Bangsamoro Parliament sa Shariff Kabunsuan Cultural Complex sa Cotabato City niadtong Biyernes, gipasalig sa Presidente nga palapdan pa sa gobyerno ang mga oportunidad sa panginabuhian ug ekonomiya sa Mindanao.
Gipamatud-an usab ni Marcos ang suporta sa National Government sa awtonomiya sa Bangsamoro ug sa mga demokratikong institusyon niini, lakip ang kaandam nga makigtambayayong sa bag-ong napiling mga lider sa Parliament.
Gipasalamatan usab sa Presidente ang mga pamilya nga nawad-an og mga minahal ug ang mga lider nga naningkamot aron makab-ot ang kalinaw sa rehiyon.
Lakip sa mga nahimong bunga sa ilang paningkamot ang Comprehensive Agreement on the Bangsamoro, Bangsamoro Organic Law ug ang pagtukod sa Bangsamoro Transition Authority.
Sumala kang Marcos, usa kini ka makasaysayanong kalampusan dili lamang alang sa mga Bangsamoro ug Mindanao, kondili alang usab sa tibuok Pilipinas.
