Nanawagan ang mga rebeldeng Houthi alang sa dinaliang pagbakwit sa mga tawo gikan sa international airport sa Aden, Yemen ang sentro ug base sa gobyerno nga giila sa internasyonal nga komunidad ug gisuportahan sa Saudi Arabia.
Sumala ni Houthi spokesperson Yahya Saree, gipagawas ang maong pasidaan tungod sa giingong presensya sa usa ka Saudi military cargo aircraft nga nagdala og mga hinagiban ug armas sa maong tugpahanan.
Hinuon, wala pay gipagawas nga opisyal nga pahayag ang mga awtoridad sa Saudi Arabia kalabot sa maong alegasyon.
Usa ka adlaw sa wala pa gipagawas ang maong pasidaan, nagkanayon ang mga lokal nga residente nga nakadungog sila og pipila ka kusog nga pagbuto sa palibot sa Aden.
Ang mga rebeldeng Houthi nga kasamtangang nagkontrolar sa kaulohan nga Sanaa sa amihanang Yemen balik-balik na nga nagpahigayon og pag-atake sa maong tugpahanan, nga nagsilbing importanteng agianan alang sa mga biyahero ug sa humanitarian aid sa habagatang bahin sa nasod.
