Gibandera sa People’s Budget Coalition ang kapin sa usa ka trilyong pesos nga giingong adunay mga kahina-hinalang alokasyon sa gisugyot nga 2027 national budget atol sa hearing sa Senate Finance Committee uban sa mga civil society organizations.
Matod ni coalition co-convener AJ Montesa, naglakip kini sa P210 bilyong soft pork, P695 bilyong hard pork ug P112 bilyong shadow pork o unprogrammed appropriations.
Gipasabot sa grupo nga ang soft pork may kalabotan sa mga programa sa ayuda nga mahimong magamit sa patronage, samtang ang hard pork nagtumong sa mga proyekto sa imprastraktura nga posibleng maimpluwensiyahan sa mga politiko.
Isip alternatibo, gisugyot sa grupo ang pagbalhin sa pondo sa Medical Assistance for Indigent and Financially Incapacitated Patients o MAIFIP ngadto sa PhilHealth, Tulong Dunong ngadto sa Tertiary Education Subsidy, ug Assistance to Individuals in Crisis Situation o AICS ngadto sa 4Ps aron masiguro ang mas direkta ug patas nga paghatag sa tabang.
Gikuwestiyon usab sa coalition ang hapit 7,000 ka proyekto nga nagkantidad og P190 bilyong pesos nga giingong walay dokumentasyon nga makita sa publiko.
Matod ni co-convener Kenneth Ibasco Abante, wala nila giakusahan nga korap ang tanang maong proyekto, apan kinahanglan nga adunay klaro ug igo nga dokumentasyon ang mga proyektong pondohan pinaagi sa buhis sa katawhan.
Tungod niini, nanawagan ang grupo sa Senado nga tangtangon sa gisugyot nga badyet ang mga proyekto nga walay gipatik nga mga dokumentong nagsuporta niini, ug giawhag usab ang Presidente nga dili kini aprubahan.
Gilauman nga magtigom ang Bicameral Conference Committee sa ikaduhang semana sa Disyembre aron hisgotan ang gisugyot nga P7.2 trilyong national budget alang sa 2027.
