GENSAN- Atubangon sa usa illegal wildlife trader ang kaso ubos sa Republic Act 9147 o Wildlife Resources Conservation and Protection Act tungod sa giingong ilegal nga pagbaligya sa mga langgam nga gikan sa Indonesia sa Barangay Bula, General Santos City.
Sumala kang Police Major Jenahmeel Toñacao, hepe sa Criminal Investigation and Detection kon CIDG-Gensan, nga giandam na nila ang mga dokumento alang sa pagsang-at sa kaso batok sa suspek.
Narekober sa entrapment operation niadtong miaging adlaw, sa Rajah Muda, Barangay Bula, ang 25 Western Crowned Pigeons, 33 Moluccan Eclectus Parrots ug duha ka Cockatoo.
Matud ni Toñacao, nasubay nila ang suspek pinaagi sa ilang confidential agent nga nakigtransaksyon niini niadtong miaging semana kalabot sa pag-abot sa bag-ong mga langgam gikan sa Indonesia.
Gituohang adunay grupo nga nalambigit sa maong kalihokan, diin adunay mga tawo nga modala sa mga langgam gikan sa Indonesia, samtang laing mga indibidwal ang modawat ug mamaligya niini, apan padayon pang giimbestigahan sa mga awtoridad ang ilang mga koneksiyon.
Giawhag usab ni Toñacao ang publiko nga ireport sa lokal nga kapulisan o CIDG ang bisan unsang kadudahan nga kalihokan kalabot sa ilegal nga pagbaligya sa mga mananap.
