GENSAN- Gibutyag ni Councilor Richard Atendido nga nangandam na ang City Administrators Office alang sa pagdawat ug pagproseso sa mga aplikasyon sa mga vendors nga mobalhin ug magnegosyo sa temporary relocation site samtang ginaandam ang Central Public Market sa Gensan alang sa redevelopment niini nga mahimong mallengke.
Sumala ni Atendido, bisan pa man nga giisip nang kwalipikado ang mga kasamtangang vendors, gikinahanglan gihapon ang pormal nga pag-apply aron pormal silang matala sa opisyal nga database sa dakbayan.
Gibutyag usab sa opisyal nga pagkahuman sa aplikasyon, ipahigayon ang pagpwesto sa mga vendors pinaagi sa draw lots o uban pang maayong pamaagi.
Gipaniguro usab niini nga magkalahi ang pwesto sa wet market ug sa dry goods.
Gilauman nga sa katapusan sa Nobyembre, mahuman o makasugod na ang pagbalhin sa mga vendors aron masugdan na ang pagdemolish sa karaang merkado ug ang pormal nga pag-turnover sa dapit ngadto sa Robinsons Land Corporation alang sa pagpalambo niini.
