Nakaplagang patay ang usa ka 65-anyos nga Amerikanong lalaki sa iyang gina-rentahan nga apartment sa Barangay Washington, Surigao City niadtong Sabado, Oktubre 10.
Base sa inisyal nga imbestigasyon, nag-check in ang biktima sa maong apartment sa Mariposa Street, Purok Orchids niadtong Oktubre 5.
Apan niadtong miaging Sabado, sa wala pa madiskobre ang patayng lawas sa biktima, nakabantay ang usa ka caretaker sa kusog ug dili maantos nga baho nga gikan sa ikaduhang andana sa apartment, ilabina sa yunit nga giokupahan sa biktima.
Gigamit sa caretaker ang ‘extra’ nga yawe aron maablihan ang maong yunit, diin iyang nakita ang patayng lawas sa biktima. Gisultihan dayon niya ang tag-iya sa apartment bahin sa iyang nakita, kinsa maoy mitawag sa kapulisan.
Ginaimbestigahan na sa mga otoridad ang hinungdan sa pagkamatay sa biktima. Matod nila, posibleng cardiac arrest ang hinungdan sa iyang kamatayon, apan wala usab gibaliwala ang posibilidad nga adunay foul play nga nalambigit niini.
Bisan pa niini, wala pa matino ang tinuod nga hinungdan sa pagkamatay sa lalaki samtang nagpaabot pa ang mga otoridad sa resulta sa autopsy.
Wala gipahibalo sa Surigao City Police ang tibuok identidad sa biktima, apan nasayran nga residente siya sa estado sa Florida sa Estados Unidos.
Karon, nakig-alayon na ang mga otoridad sa US Embassy ug sa mga paryente sa biktima.
