Giklaro ni House prosecutor ug Bukidnon Representative Jonathan Keith Flores nga dili timailhan sa kahuyang ang desisyon sa prosekusyon sa Kamara nga bawion ang artikulo sa bribery sa impeachment case batok kang Bise Presidente Sara Duterte, kondili estratehiya aron mapadali ang husay.
Sumala kang Flores, igo na ang ebidensiyang gipresentar sa prosekusyon ubos sa laing tulo ka artikulo, busa dili na kinahanglan nga magdugang pa sila og ebidensiya alang sa alegasyon sa bribery.
Pormal nang gipahibalo sa prosekusyon ang Senate Impeachment Court sa ilang pagbawi sa Article III, nga nag-akusar kang Duterte sa paghatag og suborno sa mga opisyal sa Department of Education o DepEd aron maimpluwensiyahan ang mga desisyon sa pagpamalit atol sa iyang pagdumala sa maong ahensya.
Gipasabot ni Flores nga gusto sa prosekusyon nga mahuman ang presentasyon sa ilang mga ebidensiya sa dili pa magsugod ang usa ka bulan nga recess sa husay, aron makasugod na usab ang depensa sa pagpresentar sa ilang mga ebidensiya human sa pahulay.
Bisan pa niini, giklaro niya nga posible gihapon nga mapasaka ang laing kasong kriminal kalabot sa alegasyon pinaagi sa Office of the Ombudsman o Department of Justice.
Sa husay karong Lunes, gilauman nga i-cross-examine ang kataposang saksi sa prosekusyon kalabot sa alegasyon sa dili matino nga bahandi, samtang gilauman usab nga mopahuway ang prosekusyon human makompleto ang presentasyon sa ebidensiya ubos sa Article II.
