Nasikop na sa kapulisan ang suspek sa stabbing incident sa Barangay Datal Batong, Malungon, Sarangani Province, hapon karong adlawa Oktubre 10, 2026.
Giila ang suspek nga si Paquito Tuli Jose, alyas “Paking,” 58 anyos, minyo ug mag-uuma nga residente sa Sitio Samlang, Barangay Blaan, Malungon, Sarangani Province.
Sumala sa report sa kapulisan, gilusad sa intelligence operatives ug reserve alert team sa Malungon Municipal Police Station, uban ang mga opisyal sa barangay ug force multipliers sa Barangay Blaan ug Barangay Datal Batong, ang pursuit operation batok sa suspek sayo sa buntag sa maong adlaw.
Human sa pipila ka oras nga paglakaw sa hilit nga dapit, nasikop ang suspek pasado ala-una sa hapon sa Purok Bahada, Barangay Datal Batong.
Narekober gikan sa iyang pagpanag-iya ang usa ka kutsilyo nga may gitas-on nga 7.5 ka pulgada ug adunay puti nga sakoban nga hinimo sa PVC plastic pipe.
Gidala ang suspek ug ang narekober nga ebidensiya ngadto sa estasyon sa pulisya alang sa hustong proseso, samtang giandam na ang kasong homicide batok kaniya nga ipasaka pinaagi sa inquest proceedings.
