Giaprobahan sa Budget Amendments Review Subcommittee o BARSc sa House Committee on Appropriations ang dugang P8.07 bilyon nga pondo alang sa sektor sa edukasyon para sa 2027 national budget.
Ubos sa Department of Education o DepEd, giaprobahan ang dugang P500 milyon alang sa School Safety and Security, P50 milyon para sa Madrasah Education Program, P75 milyon alang sa Special Needs Education Program, ug P25 milyon para sa Indigenous Peoples Education Program.
Lakip usab sa nadungagan ang P350 milyon alang sa Academic Recovery and Accessible Learning o ARAL Program ug P952 milyon para sa Basic Education Facilities Fund. Tungod niini, mikabat sa P1.952 bilyon ang kinatibuk-ang realignment nga giaprobahan alang sa basic education.
Samtang sa Commission on Higher Education o CHED, dugang P2.102 bilyon ang giaprobahan alang sa Tertiary Education Subsidy ug P1.766 bilyon para sa Tulong Dunong Program.
Dugang pondo usab ang giaprobahan alang sa University of the Philippines o UP System, lakip ang P70 milyon para sa UP Center for Education and Development, P275 milyon alang sa research services sa Resilience Institute ubos sa Project NOAH, ug P15 milyon para sa UP Diliman Institute of Mathematics.
Dugang P456 milyon usab ang igahin para sa Locally Funded Projects sa nagkadaiyang State Universities and Colleges o SUCs.
