Giklaro sa administrasyon sa Isulan National High School nga walay nahitabong shooting o hostage incident sulod sa ilang eskwelahan ug luwas ang tanang estudyante, magtutudlo ug personnel.
Kini ang gipahibalo ni Ma’am Lorelie Ann F. Valencia, school principal sa Isulan National High School, atol sa paghatag niini og klaripikasyon kalabot sa impormasyon nga mikaylap bahin sa giingong shooting ug hostage incident sa maong eskwelahan.
Matud ni Valencia, walay shooting ug walay hostage-taking nga nahitabo sa Isulan National High School, ug walay gikataho nga adunay nadisgrasya o nasamdan tungod sa maong insidente.
Gipasalig sa school administration nga safe ang tanan ug padayon ang pagmonitor sa sitwasyon aron masiguro ang kaluwasan sa mga estudyante ug personnel sa eskwelahan.
Ang maong impormasyon gipatik usab sa opisyal nga social media page sa Isulan National High School.
