Gitinguha ni Presidente Ferdinand Marcos Jr. nga mahimong number one ang mga estudyanteng Pilipino sa abilidad sa math, reading ug science.
Gipahayag kini sa Presidente human niya ilhon ang partisipasyon sa mga eskwelahan ug educational partners sa Programme for International Student Assessment o PISA atol sa iyang pag-apil sa usa ka kalihokan sa Cory C. Aquino National High School sa Pasay City karong Lunes.
Matud sa Presidente, nalipay siya nga adunay nakita nga kausaban sa mga estudyante sa nasud, ilabina sa ilang reading, math ug science skills.
Gipasalamatan usab niya ang mga magtutudlo, ginikanan ug tanang estudyante nga miapil sa maong testing.
Matud pa ni Marcos, maayong panig-ingnan ang maong mga kalamboan sa mga lakang aron mapalambo ug mapalig-on ang kalidad sa edukasyon ug ang performance sa mga estudyante.
Tungod niini, gitinguha sa Presidente nga maabot sa Pilipinas ang number one nga pwesto ug mapakita ang abilidad sa mga magtutudlo ug estudyante pinaagi sa suporta sa gobyerno, samtang giawhag ang tanan nga ipadayon ang maayong mga lakang alang sa edukasyon.
