Nagpasalamat si Senator Francis “Chiz” Escudero kang President Ferdinand Marcos Jr. sa dali nga pagpirma sa Republic Act No. 12326, nga nagtakda og lima ka tuig nga termino alang sa mga opisyal sa barangay ug Sangguniang Kabataan o SK.
Isip nag-unang tagsulat sa maong sugyot sa Senado, matod ni Escudero nga tumong sa balaod nga mahimong mas klaro ug mas hapsay ang siklo sa pagdumala sa barangay.
Matod niya, ang mas taas nga termino maghatag sa mga opisyal og igong panahon sa pagplano, pagpatuman ug pagtimbang-timbang sa ilang mga programa ug serbisyo nga dili maputol tungod sa kanunay nga eleksyon.
Dugang pa ni Escudero ang importante nga papel sa barangay isip frontliner sa gobyerno sa paghatag og serbisyo publiko.
Ubos sa bag-ong balaod, ibalhin sa Nobyembre 2028 ang sunod nga Barangay ug Sangguniang Kabataan Elections o BSKE.
Nagpasalamat usab ang Senador sa iyang mga kauban sa Senado ug House of Representatives tungod sa ilang suporta sa pagpasa sa maong reporma.
