Kapin sa 17,000 ka mga pulis ang ipakatag sa Metro Manila alang sa mga kalihokan nga may kalabotan sa ika-54 nga anibersaryo sa deklarasyon sa Martial Law.
Sumala sa National Capital Region Police Office o NCRPO, mokabat sa 17,085 ka police personnel, lakip ang mga crowd dispersal management contingents ug mga pulis gikan sa kasikbit nga mga rehiyon, ang i-deploy.
Gilauman nga adunay mga pagtigom sa EDSA Shrine, People Power Monument, Mendiola ug Liwasang Bonifacio, lakip na sa palibot sa Senado ug House of Representatives.
Base sa police assessment, gibanabana nga mokabat sa 3,000 ka mga tawo ang motambong sa maong mga kalihokan.
Samtang, gipahayag sa NCRPO nga wala pa silay namonitor nga validated threat, apan magpadayon ang ilang hugot nga pagbantay alang sa seguridad.
Gihangyo usab sa kapulisan ang mga grupong magpahigayon og protesta nga mosiguro sa gikinahanglang permit ug makigkoordinar sa mga awtoridad alang sa seguridad ug traffic rerouting.
