Posibleng mokunhod ngadto sa 13 ang ihap sa mga boto nga gikinahanglan aron ma-convict si Vice President Sara Duterte kung 20 lamang ka senador ang legal nga makaapil isip senator-judges sa oras sa final voting sa impeachment case.
Kini ang interpretasyon nga gipresentar sa abogado ug law professor nga si Howard Calleja, base sa probisyon sa Konstitusyon nga nagkinahanglan og two-thirds concurrence sa tanang miyembro sa Senado alang sa conviction.
Matud ni Calleja, dili awtomatikong 16 o 24 ang mahimong basehan sa pagkalkula sa two-thirds, tungod kay mahimong magdepende kini sa aktuwal ug legal nga ihap sa mga senator-judge nga makaapil sa ilang katungdanan.
Kung 20 ang makaapil sa botohan, gibanabana ni Calleja nga 13 ka boto ang gikinahanglan alang sa conviction, samtang kinahanglan pang matino kung 13 o 14 ang threshold kung 21 ka senator-judge ang makaapil.
Sa pagkakaron, nagpabilin sa 16 ka boto ang conviction threshold base sa nauna nga ruling sa presiding officer sa Impeachment Court, nga mao usab ang posisyon sa House prosecution.
Gidapit usab sa Impeachment Court ang mga kanhi mahistrado sa Supreme Court aron mohatag og opinyon sa constitutional requirement sa dili pa hisgutan sa mga senator-judge ang kontrobersyal nga voting threshold.
Ang Impeachment Court maoy modesisyon kung magpabilin ba sa 16 ka boto ang kinahanglan o mogamit og laing interpretasyon sa dili pa moabot sa final voting ang kaso batok sa bise presidente.
