Andam na ang Philippine National Police, Armed Forces of the Philippines ug provincial government sa Maguindanao alang sa unang parliamentary election sa Bangsamoro Autonomous Region in Muslim Mindanao o BARMM karong Septiyembre 14.
Gipatuman na sa PNP ang full alert status sa BARMM sugod niadtong Septiyembre 11 hangtod Septiyembre 30, samtang gi-red alert na usab sa Provincial Disaster Risk Reduction and Management Council sa Maguindanao ang ilang mga response team.
Sumala sa PNP, 98 porsyento na ang ilang kahandam alang sa seguridad sa eleksyon, diin kapin 10,000 ka police personnel ang gipakatap sa rehiyon, lakip ang augmentation forces.
Gipakatap usab sa Philippine Army ang kapin 11,900 ka sundalo ug CAFGU aron motabang sa election security, lakip ang mga tank platoon, security platoon ug mechanized infantry units isip visible deterrence ug paspas nga response force.
Tumong sa maong mga pagpangandam nga masiguro ang luwas, malinawon ug hapsay nga pagpahigayon sa makasaysayang unang BARMM parliamentary election.
