Pormal nang gipahibalo ni United Kingdom Foreign Minister Ed Miliband ang pagpahamtang og mga ‘sanctions’ batok sa mga ilegal nga Israeli settlements sa gi-okupar nga West Bank.
Sa iyang pakigpulong sa Parliament ning Martes, gipadayag ni Miliband nga magpatuman ang Britain og import ban o pagdili sa pagsulod sa mga produkto nga gikan sa maong Israeli settlements.
Gawas niini, maglatid usab ang gobyerno og komprehensibong rehimen sa ‘sanctions’ nga magdili sa paghatag og pinansyal nga tabang, serbisyo sa konstruksyon ug uban pang komersyal nga suporta alang sa maong mga komunidad.
Gibase sa United Kingdom ang maong lakang sa 2024 Advisory Opinion sa International Court of Justice o ICJ, nga nagdeklarar nga supak sa internasyonal nga balaod ang padayong presensya ug pagpalapad sa Israel sa West Bank.
Matud ni Miliband, tumong sa bag-ong polisiya sa London nga mapanalipdan ang posibilidad sa two-state solution, taliwala sa nagkagrabeng kapintasan nga gihimo sa mga ekstremistang settler batok sa mga Palestinian.
Dali usab nga gisaway sa gobyerno sa Israel ang maong desisyon, samtang nagpahayag og kabalaka ang pipila sa mga kaalyado niini sa Kasadpan bahin sa posibleng epekto sa maong lakang sa kalig-on ug diplomatikong relasyon sa rehiyon sa Middle East.
