Moatubang sa korte si kanhi Speaker Ferdinand Martin Romualdez aron tubagon ang mga alegasyon nga gipasaka batok kaniya.
Kini ang gipasalig sa iyang abogado nga si Atty. Ade Fajardo.
Matud ni Fajardo, gitahod ni Romualdez ang korte ug ang legal nga proseso ug iyang atubangon ang mga akusasyon subay sa balaod.
Sumala sa abogado, importante nga manaog ang proseso sa hudikatura bisan pa man sa dakong interes sa publiko bahin sa maong kaso.
Matud pa niya, ang kriminal nga responsibilidad kinahanglan matino base sa mga ebidensyang ipresentar ug susihon sa korte.
Dugang pa usab ni Fajardo nga wala nangayo si Romualdez og espesyal nga pagtratar samtang iyang giatubang ang mga alegasyon.
Hinuon, ang iyang gipangayo mao lamang ang parehas nga due process ug patas nga pagdungog nga gigarantiyahan sa balaod alang sa matag Pilipino.
Sumala pa kang Fajardo, kinahanglan nga manaog sa hearing ang kamatuoran, ebidensya ug patas nga proseso, imbes nga mga opinyon o paghukom una pa mahuman ang legal nga proseso.
