Gitawag nga “ironic” ni House prosecution panel spokesperson ug Lanao del Sur Representative Zia Alonto Adiong ang pahayag ni Vice President Sara Duterte nga nabalaka siya alang sa iyang kaluwasan ug seguridad sa iyang pamilya.
Matud ni Adiong, dili matod pa tukma ang maong pahayag tungod kay nag-atubang si Duterte og tulo ka kaso sa grave threats may kalabotan sa iyang mga pahayag niadtong 2024 nga adunay iyang nakaistoryang tawo aron ipapatay sila ni Pangulong Ferdinand Marcos Jr., First Lady Liza Araneta-Marcos ug kanhi House Speaker Martin Romualdez kung siya mismo mapatay.
Mipiyansa si Duterte og P360,000 niadtong Sabado sa Quezon City court, usa ka adlaw human gipagawas ang arrest warrant batok kaniya.
Sa wala pa misulod sa korte, miingon si Duterte nga wala siya’y pagsalig sa pulisya ug nahadlok siya alang sa iyang seguridad ug sa iyang pamilya, nga giingon usab niyang nakasinati og harassment sukad pa niadtong 2023.
Gikuwestiyon ni Adiong ang maong pahayag ug miingon nga daw si Duterte pa ang nagpakitang biktima bisan siya mismo ang nag-atubang sa kasong may kalabotan sa pagpanghulga, apan iyang gipadayag nga kinahanglan gihapon seryosong imbestigahan ang bisan unsang aktuwal nga hulga batok sa bise presidente ug iyang pamilya.
