Padayon nga pagatumanon ni Vice President Sara Duterte ang iyang mga opisyal nga katungdanan sa gobyerno samtang ang iyang legal team maoy motambong ug morepresentar kaniya sa impeachment trial.
Sumala kang Defense Deputy Spokesperson Atty. Justin Nicol Gular, bug-os nga pagsalig gihatag sa Bise Presidente sa iyang mga abogado aron sila ang motambong sa mga hearing, aron dili maapektuhan o maantala ang iyang pagserbisyo sa publiko.
Matud ni Gular, lisod alang kang Duterte nga motambong sa impeachment court sa tanang higayon tungod kay aduna usab siyay daghang katungdanan nga kinahanglan niyang atimanon isip ikaduhang pangulo sa nasud.
Gipasiugda usab sa spokesperson nga dili obligado ang Bise Presidente nga personal nga motambong sa matag hearing, tungod kay gitugotan sa impeachment rules nga mahimong legal counsel niini ang morepresentar alang kaniya.
Bisan pa niini, gipasalig sa depensa nga personal nga motambong si Duterte kung gikinahanglan ug kung hangyoon ang iyang presensya sa proceedings.
Samtang nagpadayon ang legal nga proseso sa impeachment, nakita si Duterte sa Peñafrancia Basilica Minore sa Naga City niadtong Setyembre 1, diin mitambong siya sa usa ka balaang misa isip pakig-uban sa pagsugod sa tinuig nga Peñafrancia Festivities sa Bicol.
