Gipahugot sa Department of the Interior and Local Government o DILG ang seguridad sa mga eskwelahan tungod sa mga insidente sa krimen nga nahitabo sulod sa mga campus.
Sumala ni DILG Secretary Jonvic Remulla, gipaubaya sa mga pribadong eskwelahan ang pagpatuman sa hugot nga pagbantay sa mga mosulod aron mapugngan ang pagdala og mga armas.
Alang sa mga publikong eskwelahan, giingon ni Remulla nga ipakatap ang mga barangay tanod aron magpatuman og mandatory nga pag-check sa mga bag sa mga estudyante.
Tumong sa maong lakang nga mapugngan ang pagbalik sa mga insidente sa krimen sulod sa mga eskwelahan.
Dugang pa ni Remulla, nagplano ang DILG ug Philippine National Police o PNP og Quick Reaction Force nga motubag dayon sa mga insidente nga mahitabo sa mga eskwelahan.
Gipasiugda usab ni Remulla ang panginahanglan sa mas hugot nga gun control sa nasod ug ang pagpabug-at sa silot batok sa mga nagpasagad sa ilang service firearms.
