Gipasalig sa Kongreso ang pagdugang og kapin 2,000 ka guidance personnel sa mga pampublikong eskwelahan sa 2027, lakip ang gisugyot nga P802 milyon nga pondo alang sa pagpalig-on sa mental health ug child protection services sa mga estudyante.
Sumala ni House Minority Leader Marcelino Libanan, apil sa gisugyot nga P7.2-trilyong national budget alang sa 2027 ang pagmugna og 1,800 school counselor associate positions ug 221 school division counselor positions ubos sa Department of Education o DepEd.
Matud ni Libanan, importante ang dugang nga counseling personnel tungod sa mga taho sa bullying, school violence ug uban pang problema nga mahimong makaapekto sa emosyonal ug mental nga kahimtang sa mga estudyante.
Dili lamang physical security ang gikinahanglan aron mapanalipdan ang mga estudyante, sumala pa ni Libanan, kundili kinahanglan usab palig-onon ang emotional ug psychological support sulod sa mga eskwelahan.
Giingon niya nga ang guidance counselors kabahin sa unang depensa sa mga eskwelahan tungod kay makatabang sila sa pag-ila sa mga estudyanteng nanginahanglan og suporta ug sa paghimo og mas luwas ug maayong palibot sa pagkat-on.
Gihangyo usab ni Libanan ang mga pribadong elementarya ug high school nga palig-onon ang ilang counseling services, tungod kay responsibilidad sa tibuok komunidad ang kaluwasan ug kaayohan sa mga kabataan.
