Luwas ug malampuson nang nakapauli sa Pilipinas ang 46 ka overseas Filipino workers o OFWs gikan sa Kuwait ug 17 ka Pilipinong marino sa M/V Minoan Dignity, sumala sa Overseas Workers Welfare Administration o OWWA.
Miabot sa NAIA Terminal 1 ang 46 ka OFWs sakay sa Kuwait Airways Flight KU417, samtang miabot sa Terminal 3 ang 17 ka marino sakay sa Emirates Flight EK334 niadtong Biyernes, Agosto 21.
Naluwas ang mga marino human maigo sa wala pa mailhing projectile ang M/V Minoan Dignity samtang naglawig sa Strait of Hormuz niadtong Agosto 18.
Adunay 18 ka Pilipinong tripulante nga sakay sa barko atol sa insidente, diin usa ka Pilipinong chief engineer ang namatay.
Human maluwas, gidala sa Khasab, Oman ang 17 ka nakaluwas nga marino sa wala pa gihimo ang ilang repatriation o pagpauli sa Pilipinas.
Sinalubong ug gitabangan sila sa OWWA, Department of Migrant Workers o DMW, MIAA Medical Team ug sa ilang licensed manning agency sa ilang pag-abot sa nasud.
Samtang, giatiman usab sa OWWA ang 46 ka OFWs gikan sa Kuwait ug gihatagan sila og nagkadaiyang tabang sama sa financial assistance, pagkaon, temporaryong kapuy-an ug transportasyon paingon sa ilang tagsa-tagsa ka probinsya.
Gipasiguro usab sa OWWA nga magpadayon ang suporta sa ilang regional welfare offices alang sa mga OFW ug marino, lakip ang welfare assistance, livelihood, employment, counseling ug uban pang reintegration assistance depende sa ilang panginahanglan.
